అమరావతి : రాబోయే స్థానిక సంస్థల ఎన్నికల్లో భాగంగా జెడ్పీ ఎన్నికలను విభజించిన కొత్త జిల్లాల ప్రాతిపదికన నిర్వహించేందుకు ప్రభుత్వం కసరత్తు ప్రారంభించిందని ఉప ముఖ్యమంత్రి పవన్ కళ్యాణ్ వెల్లడించారు. పంచాయతీల పునర్విభజన విషయంలో న్యాయపరమైన అడ్డంకులు లేవని స్పష్టం చేశారు. స్థానిక సంస్థల స్వావలంబన, బలోపేతమే కూటమి ప్రభుత్వ ప్రధాన లక్ష్యమని పేర్కొన్నారు.
శాసనసభలో గురువారం జరిగిన చర్చలో ఆయన మాట్లాడుతూ… అధికారంలోకి వచ్చిన వెంటనే స్థానిక సంస్థలను బలోపేతం చేసే చర్యలు ప్రారంభించామని తెలిపారు. పంచాయతీరాజ్, గ్రామీణాభివృద్ధి వ్యవస్థలను ప్రజలకు మరింత చేరువ చేయడమే ప్రభుత్వ ధ్యేయమన్నారు.
అభివృద్ధి–పర్యావరణ సమతుల్యం
రహదారుల విస్తరణ వంటి అభివృద్ధి కార్యక్రమాల కోసం చెట్ల తొలగింపు తప్పనిసరి అయితే, దానికి తగిన ప్రత్యామ్నాయాలను అమలు చేసే దిశగా ప్రభుత్వం ఆలోచిస్తున్నదని ఉప ముఖ్యమంత్రి వెల్లడించారు. పర్యావరణ పరిరక్షణ విషయంలో కఠిన చట్టం తీసుకొచ్చే అంశాన్ని కూడా పరిశీలిస్తున్నట్లు తెలిపారు.
“పచ్చదనాన్ని కాపాడాలంటే కేవలం మొక్కలు నాటడమే కాదు… వాటి సంరక్షణకు బలమైన వ్యవస్థ అవసరం. చట్టం కఠినంగా అమలు చేస్తేనే ఫలితాలు కనిపిస్తాయి” అని ఆయన స్పష్టం చేశారు.
నాటే ప్రతి మొక్కకు జియో ట్యాగ్
అటవీ శాఖ ఆధ్వర్యంలో నాటే ప్రతి మొక్కకు జియో ట్యాగింగ్ విధానం అమలు చేసే దిశగా ప్రత్యేక వ్యవస్థను తీసుకురానున్నట్లు పవన్ కళ్యాణ్ తెలిపారు. నర్సరీ దశ నుంచే పర్యవేక్షణ ఉండేలా ఆధునిక సాంకేతికతను వినియోగించనున్నట్లు చెప్పారు. బెంగళూరులో అమలవుతున్న నమూనాలను అధ్యయనం చేస్తున్నామని వెల్లడించారు.
ఎర్రచందనం అమ్మకాల విషయంలో అంతర్జాతీయ ధరలకు అనుగుణంగా వేలాలు నిర్వహించేందుకు ప్రత్యేక బృందాన్ని నియమించినట్లు తెలిపారు. గోదాముల్లో ఉన్న దుంగలను పారదర్శకంగా విక్రయించి ప్రభుత్వానికి మెరుగైన ఆదాయం అందేలా చర్యలు తీసుకుంటామని చెప్పారు.
బడ్జెట్ ప్రతిపాదనలు సభలో
2026–27 ఆర్థిక సంవత్సరానికి సంబంధించి పంచాయతీరాజ్, గ్రామీణాభివృద్ధి, అటవీ, పర్యావరణ, సైన్స్ అండ్ టెక్నాలజీ శాఖల బడ్జెట్ ప్రతిపాదనలను ఉప ముఖ్యమంత్రి సభకు సమర్పించారు.
పంచాయతీరాజ్ శాఖకు రూ.15,485 కోట్లు
గ్రామీణాభివృద్ధి శాఖకు రూ.11,217 కోట్లు
అటవీ, సైన్స్ అండ్ టెక్నాలజీ శాఖలకు రూ.713 కోట్లు
ఈ నిధులతో గ్రామీణ మౌలిక సదుపాయాల అభివృద్ధి, పచ్చదనం పరిరక్షణ, సాంకేతిక ఆధారిత పరిపాలనకు ప్రాధాన్యం ఇస్తామని తెలిపారు.
సభలో ప్రజా సమస్యలపై చర్చించిన ఎమ్మెల్యేలు పంచకర్ల రమేష్ బాబు, బండారు సత్యనారాయణ మూర్తి లకు ఉప ముఖ్యమంత్రి కృతజ్ఞతలు తెలిపారు.
స్థానిక సంస్థలను ఆర్థిక, పరిపాలనా పరంగా బలోపేతం చేయడమే ప్రభుత్వ దీర్ఘకాల దృష్టికోణమని పవన్ కళ్యాణ్ స్పష్టం చేశారు.