ఈ సందర్భంగా సంఘం జిల్లా కార్యదర్శి బాల రంగయ్య, అధ్యక్షుడు రంగారెడ్డి, ఉపాధ్యక్షుడు పెద్ద ముస్తూరు వెంకటేశ్వర్లు మాట్లాడుతూ ప్రభుత్వ ప్రకటనలు కాగితాలకే పరిమితమవుతున్నాయని మండిపడ్డారు. CCRC (కౌలు గుర్తింపు కార్డులు) కలిగిన ప్రతి రైతుకు రూ.2 లక్షల వరకు పంట రుణాలు ఇస్తామని ప్రభుత్వం ప్రకటించినప్పటికీ, క్షేత్రస్థాయిలో బ్యాంకర్లు సవాలక్ష నిబంధనలు విధించి రుణాల మంజూరును ఆలస్యం చేస్తున్నారని ఆరోపించారు.
రేణుమాకులపల్లి, లత్తవరం గ్రామాల్లో దేవాలయ మాన్య భూములను సాగు చేస్తున్న కౌలు రైతుల పరిస్థితి మరింత దయనీయంగా మారిందని వారు పేర్కొన్నారు. ‘వెబ్ల్యాండ్’ ఆన్లైన్లో రైతుల పేర్లు కనిపించడం లేదనే సాకుతో స్టేట్ బ్యాంక్ ఆఫ్ ఇండియా (SBI), యూనియన్ బ్యాంక్ ఆఫ్ ఇండియా అధికారులు రుణాలు నిరాకరిస్తున్నారని ఆరోపించారు. సంవత్సరాలుగా సాగు చేస్తున్న భూములకు సంబంధించి రికార్డులు సరిచేయడంలో అధికారులు నిర్లక్ష్యం ప్రదర్శిస్తున్నారని విమర్శించారు.
గత ఏడాది అక్టోబర్ నుంచే సమస్యను జిల్లా కలెక్టర్, ఎల్డీఎం (లీడ్ డిస్ట్రిక్ట్ మేనేజర్) దృష్టికి తీసుకెళ్లినా ఇప్పటివరకు ఎటువంటి స్పష్టమైన పరిష్కారం లభించలేదని సంఘం నాయకులు ధ్వజమెత్తారు. పంట సీజన్ మధ్యలో రుణాలు లభించకపోవడంతో రైతులు అధిక వడ్డీతో ప్రైవేట్ అప్పులవైపు మొగ్గుచూపాల్సి వస్తోందని ఆవేదన వ్యక్తం చేశారు.
కూటమి ప్రభుత్వం ఎన్నికల సమయంలో హామీ ఇచ్చిన ‘అన్నదాత సుఖీభవ’ పథకాన్ని వెంటనే అమలు చేసి ప్రతి కౌలు రైతు ఖాతాలో రూ.20,000 జమ చేయాలని వారు డిమాండ్ చేశారు. అలాగే ఆత్మహత్య చేసుకున్న కౌలు రైతు కుటుంబాలకు రూ.25 లక్షల పరిహారం ప్రకటించాలని కోరారు. కౌలు రైతులకు పంట బీమా, ఇన్పుట్ సబ్సిడీలు సమానంగా అందేలా చర్యలు తీసుకోవాలని విజ్ఞప్తి చేశారు.
ధర్నా అనంతరం తమ డిమాండ్లతో కూడిన వినతిపత్రాన్ని డిప్యూటీ తహసిల్దార్, మండల వ్యవసాయ అధికారికి అందజేశారు. సమస్యల పరిష్కారానికి త్వరితగతిన చర్యలు తీసుకుంటామని అధికారులు హామీ ఇచ్చినట్లు సంఘం నాయకులు తెలిపారు.
ఈ కార్యక్రమంలో కౌలు రైతులు రామాంజనేయులు, సీనప్ప, తిప్పమ్మ, సుంకన్న, నరసింహ నాయక్ తదితరులు పాల్గొన్నారు. రైతుల సమస్యలు తక్షణం పరిష్కరించకపోతే ఉద్యమాన్ని మరింత ఉధృతం చేస్తామని సంఘం నేతలు హెచ్చరించారు.