విద్యార్థుల సమస్యల పరిష్కారంలో ప్రభుత్వం విఫలమైందంటూ మండిపడ్డ పీఎస్ఎఫ్ రాష్ట్ర ప్రధాన కార్యదర్శి అబ్దుల్ ఆలం.
రాష్ట్రంలో విద్యార్థులు ఎదుర్కొంటున్న విద్యాపరమైన సమస్యలను పరిష్కరించడంలో ప్రభుత్వం పూర్తిగా విఫలమైందని ప్రోగ్రెస్ స్టూడెంట్ ఫెడరేషన్ (PSF) రాష్ట్ర ప్రధాన కార్యదర్శి అబ్దుల్ ఆలం తీవ్రంగా విమర్శించారు. శనివారం (మార్చి 14) ఏలూరు జిల్లాలో నిర్వహించిన పీఎస్ఎఫ్ నూతన కమిటీ ఎన్నికల కార్యక్రమానికి ఆయన ముఖ్య అతిథిగా విచ్చేశారు.
పోరాటమే లక్ష్యం కావాలి:
ఈ సందర్భంగా అబ్దుల్ ఆలం మాట్లాడుతూ.. విద్యాసంస్థల్లో కనీస మౌలిక సదుపాయాల కల్పన, ఫీజుల నియంత్రణ, మరియు విద్యార్థుల భద్రత విషయంలో ప్రభుత్వం తీవ్ర నిర్లక్ష్యంగా వ్యవహరిస్తోందని మండిపడ్డారు. విద్యార్థుల హక్కుల సాధన కోసం నూతనంగా ఎన్నికైన కమిటీ క్షేత్రస్థాయిలో నిరంతరం పోరాడాలని ఆయన పిలుపునిచ్చారు.
ఏకగ్రీవంగా నూతన కార్యవర్గ ఎన్నిక:
ఈ ఎన్నికల కార్యక్రమంలో ఏలూరు జిల్లా నూతన కమిటీ అధ్యక్షుడిగా కుమార్, జిల్లా కార్యదర్శిగా పవన్ కుమార్ ఏకగ్రీవంగా ఎన్నికయ్యారు. అనంతరం బాధ్యతలు స్వీకరించిన వారు మాట్లాడుతూ.. తమపై నమ్మకంతో ఈ బాధ్యతలు అప్పగించిన రాష్ట్ర కమిటీకి ప్రత్యేక కృతజ్ఞతలు తెలిపారు. ఏలూరు జిల్లాలో ప్రతి విద్యార్థికి అండగా నిలుస్తూ, విద్యార్థి సంఘాన్ని మరింత బలోపేతం చేసే దిశగా పని చేస్తామని వారు ఈ సందర్భంగా హామీ ఇచ్చారు.
ఈ కార్యక్రమంలో PSF రాష్ట్ర ఉపాధ్యక్షులు జీవన్ కుమార్, మరియు సాయి, మంజు తదితర విద్యార్థి సంఘం నాయకులు పెద్ద ఎత్తున పాల్గొన్నారు.