అమరావతి: రాష్ట్రంలో న్యాయ వ్యవహారాల నిర్వహణను మరింత సమర్థవంతంగా మార్చేందుకు ప్రభుత్వం చర్యలు వేగవంతం చేస్తోంది. ముఖ్యమంత్రి నారా చంద్రబాబు నాయుడు నాయకత్వంలో సచివాలయం బ్లాక్-2లో నిర్వహించిన గ్రూప్ ఆఫ్ మినిస్టర్స్ (GoM) సమావేశంలో ఆరోగ్యశాఖ మంత్రి సత్యకుమార్ వై పాల్గొన్నారు.ఈ సమావేశంలో ప్రధానంగా ప్రభుత్వానికి సంబంధించిన పెండింగ్ కోర్టు కేసులు, వాటి పరిష్కారంలో ఉన్న ఆలస్యాలు, న్యాయ వ్యవహారాల నిర్వహణలో సమర్థత పెంపు వంటి అంశాలపై విస్తృతంగా చర్చించారు. కేసుల పరిష్కారాన్ని వేగవంతం చేయడానికి సమయపాలనకు ప్రాధాన్యం ఇవ్వాలని సూచించారు.
మంత్రి సత్యకుమార్ వై మాట్లాడుతూ, ప్రభుత్వ వ్యవహారాల్లో పారదర్శకతను పెంపొందించడంతో పాటు, న్యాయపరమైన వ్యవహారాలను సమర్థవంతంగా నిర్వహించడం అత్యవసరమని పేర్కొన్నారు. ఈ దిశగా లిటిగేషన్ పాలసీని మరింత బలోపేతం చేయాలని ఆయన సూచించారు.
ప్రభుత్వ విభాగాల మధ్య సమన్వయం పెంచడం ద్వారా కోర్టు కేసుల సంఖ్యను తగ్గించవచ్చని, అదే సమయంలో ప్రజలకు త్వరితగతిన న్యాయం అందించే విధంగా వ్యవస్థను తీర్చిదిద్దాల్సిన అవసరం ఉందని అభిప్రాయపడ్డారు.
ఈ సమావేశం ద్వారా ప్రభుత్వ న్యాయ వ్యవహారాలపై స్పష్టమైన కార్యాచరణ ప్రణాళిక రూపొందించబడే అవకాశాలు ఉన్నాయని అధికారులు భావిస్తున్నారు.