శత్రు డ్రోన్‌ను కూల్చివేసిన కువైట్ సరిహద్దు అధికారి

కువైట్ , ఏప్రిల్ 3: కువైట్ ప్రాదేశిక సమగ్రతను కాపాడటంలో సరిహద్దు భద్రతా దళం అప్రమత్తంగా వ్యవహరించింది. కువైట్ అంతర్గత మంత్రిత్వ శాఖకు చెందిన బోర్డర్ సెక్యూరిటీ అధికారి అబ్దుల్లా అల్-ధలాన్, దేశ భద్రతకు ముప్పుగా భావించిన ఒక అనుమానాస్పద శత్రు డ్రోన్‌ను విజయవంతంగా కూల్చివేశారు. ఈ డ్రోన్ ఇరాన్‌కు చెందినదిగా అనుమానిస్తున్నట్లు అధికారులు తెలిపారు.

సరిహద్దు ప్రాంతంలో అనుమానాస్పదంగా కదులుతున్న డ్రోన్‌ను గుర్తించిన అబ్దుల్లా, అది లక్ష్యాన్ని చేరుకునేలోపే గాల్లోనే పేల్చివేయడంతో పెద్ద ప్రమాదం తప్పింది. అయితే ఈ సాహసోపేత చర్యలో డ్రోన్ శకలాలు తగలడంతో ఆయన గాయపడ్డారు. ప్రస్తుతం ఆయన స్థానిక ఆసుపత్రిలో చికిత్స పొందుతున్నారు.

ఈ ఘటనపై స్పందించిన కువైట్ మొదటి ఉప ప్రధాన మంత్రి, అంతర్గత వ్యవహారాల శాఖ మంత్రి షేక్ ఫహద్ యూసుఫ్ సౌద్ అల్-సబా ఆసుపత్రికి వెళ్లి గాయపడిన అధికారిని పరామర్శించారు. అబ్దుల్లా ఆరోగ్య పరిస్థితిపై వైద్యులతో చర్చించి, ఉత్తమ చికిత్స అందించాలని ఆదేశించారు.

“దేశ భద్రత కోసం ప్రాణాలను పణంగా పెట్టి పనిచేసే అబ్దుల్లా వంటి అధికారులు అందరికీ ఆదర్శం. వారి ధైర్యం, దేశభక్తి భద్రతా దళాలకు స్ఫూర్తిదాయకం” అని మంత్రి ప్రశంసించారు.

ఈ ఘటన నేపథ్యంలో సరిహద్దు ప్రాంతాల్లో భద్రతను మరింత కట్టుదిట్టం చేసినట్లు అధికారులు తెలిపారు. దేశ సరిహద్దులను దాటి వచ్చే ఎలాంటి ముప్పునైనా తిప్పికొట్టేందుకు సైన్యం పూర్తిగా సిద్ధంగా ఉందని స్పష్టం చేశారు.