అన్నమయ్య జిల్లా: ఆట.. వేట.. చివరకు కన్నీటి మూట!
క్రికెట్ బెట్టింగ్ మాయాజాలంపై అన్నమయ్య ఎస్పీ ధీరజ్ కునుబిల్లి ఐపీఎస్ హెచ్చరిక.
మదనపల్లి, ఏప్రిల్ 12: ఒకప్పుడు పండుగలతో కళకళలాడాల్సిన మధ్యతరగతి ఇంటి గడప… ఈరోజు నిశ్శబ్దంతో ముసురుకుంది. కారణం—‘క్రికెట్ బెట్టింగ్’ అనే మాయలో చిక్కుకున్న ఓ యువకుడు. ఫోన్లో సిక్సర్లు కొట్టిన ఆనందం క్షణాల్లోనే అప్పుల భారం, పరువు నష్టం, భయాందోళనలుగా మారింది. చివరకు ఇంటి నుంచి పరారయ్యే పరిస్థితి వచ్చింది. ఇదే దృశ్యం ఇప్పుడు అనేక కుటుంబాల్లో పునరావృతమవుతోంది.
ఐపీఎల్ సీజన్ నేపథ్యంలో సరదాగా మొదలయ్యే ఈ బెట్టింగ్ వ్యసనం ఎలా జీవితాలను నాశనం చేస్తోందో అన్నమయ్య జిల్లా ఎస్పీ ధీరజ్ కునుబిల్లి, ఐపీఎస్ స్పష్టంగా వివరించారు.
“ఒకప్పుడు జూదం గుట్టుచప్పుడు కాకుండా జరిగేది. ఇప్పుడు ప్రతి యువకుడి చేతిలో ఉన్న స్మార్ట్ఫోన్నే జూదశాలగా మారింది” అని ఆయన పేర్కొన్నారు.
అపరిచితుల నుంచి వచ్చే లింక్లతో యాప్లు డౌన్లోడ్ చేయడం… మొదట్లో చిన్న మొత్తాలు గెలవడం… అదే నమ్మకంగా మారి పెద్ద మొత్తాలు పెట్టుబడి పెట్టడం—ఇదే బానిసత్వానికి దారి తీస్తుందని ఎస్పీ తెలిపారు.
ఒక్కసారి నష్టపోతే, తిరిగి గెలవాలనే ఆశతో కుటుంబ ఆస్తులు తాకట్టు పెట్టడం, అప్పులు చేయడం జరుగుతోందన్నారు. చివరకు ఆర్థిక ఒత్తిడితో దొంగతనాలు, సైబర్ నేరాలు, ఆత్మహత్యల దిశగా యువత వెళ్లే ప్రమాదం ఉందని హెచ్చరించారు.
తల్లిదండ్రులకు హెచ్చరిక
మీ పిల్లలు ఫోన్లో ఏమి చూస్తున్నారు? మ్యాచ్ సమయంలో అసహజమైన టెన్షన్ చూపిస్తున్నారా? అకస్మాత్తుగా డబ్బుల కోసం అబద్ధాలు చెబుతున్నారా? అయితే వారు బెట్టింగ్ బారిన పడే అవకాశముంది. ఫోన్ ఇవ్వడం అంటే కేవలం వినోదం కాదు—వారి భవిష్యత్తుకు బాధ్యత కూడా అని ఎస్పీ సూచించారు.
పోలీసుల కఠిన నిఘా
జిల్లా సైబర్ క్రైమ్ విభాగం బెట్టింగ్ యాప్లు, వెబ్సైట్లు, వాట్సాప్ గ్రూపులపై నిరంతరం నిఘా ఉంచుతోందని తెలిపారు.
“మైదానంలో మాత్రమే కాదు… మీ ఫోన్లో కూడా మా నిఘా ఉంది” అని ఎస్పీ స్పష్టం చేశారు.
బెట్టింగ్ కేసుల్లో చిక్కుకుంటే క్రిమినల్ రికార్డు నమోదై భవిష్యత్తు దెబ్బతింటుందని, ప్రభుత్వ ఉద్యోగాలు, పాస్పోర్ట్ అవకాశాలు కోల్పోయే ప్రమాదం ఉందని హెచ్చరించారు.
యువతకు ఎస్పీ సందేశం
“మీరు పందెం కాసే ప్రతి రూపాయి… మీ తల్లిదండ్రుల చెమట చుక్క. బుకీలు సంపాదిస్తుంటే, మీరు అప్పుల బారిన పడటం ఎందుకు? ఆటను ఆటగా చూడండి… జీవితాన్ని నాశనం చేసే జూదంగా మార్చకండి.”
ప్రజలకు సూచన
మీ ప్రాంతంలో బెట్టింగ్ జరుగుతున్నట్లు తెలిసినా వెంటనే 100 / 112 కు లేదా సమీప పోలీసులకు సమాచారం ఇవ్వాలని అన్నమయ్య పోలీసులు కోరారు. సమాచారం ఇచ్చిన వారి వివరాలు గోప్యంగా ఉంచుతామని తెలిపారు.