తిరుపతి :ట్రూ టైమ్స్ ఇండియా అక్టోబర్ 08
ఆంధ్రప్రదేశ్ ఉన్నత విద్యా మండలి (APCHE) సంచలన నిర్ణయం తీసుకుంది. అధిక ఫీజులు వసూలు చేసిన ఆరోపణల నేపథ్యంలో మోహన్ బాబు యూనివర్సిటీ (MBU) గుర్తింపును రద్దు చేయాలని రాష్ట్ర ప్రభుత్వానికి సిఫార్సు చేయాలని యోచిస్తున్నట్లు సమాచారం.
గత మూడేళ్లుగా యూనివర్సిటీ విద్యార్థుల నుంచి ఏకంగా ₹26 కోట్ల అదనపు ఫీజులు వసూలు చేసిందనే ఆరోపణలపై ఏపీ ఉన్నత విద్యా మండలి విచారణ చేపట్టింది. ఈ విచారణలో అధిక ఫీజుల అక్రమ వసూళ్లు నిజమేనని మండలి నిర్ధారించింది.
కీలక ఆదేశాలు, జరిమానా:
విచారణ ఫలితాల ఆధారంగా ఉన్నత విద్యా మండలి కీలక ఆదేశాలు జారీ చేసింది:
₹26 కోట్లు తిరిగి చెల్లింపు: విద్యార్థుల నుంచి అదనంగా వసూలు చేసిన ₹26 కోట్లను 15 రోజుల్లోగా వారికి తిరిగి చెల్లించాలని యూనివర్సిటీని ఆదేశించింది.
₹15 లక్షల జరిమానా: అక్రమ వసూళ్లకు గాను యూనివర్సిటీపై ₹15 లక్షల జరిమానా విధించింది.
గుర్తింపు రద్దుకు సిఫార్సు:
ఈ తీవ్రమైన అక్రమాలు వెలుగులోకి వచ్చిన నేపథ్యంలో, మోహన్ బాబు యూనివర్సిటీ గుర్తింపును శాశ్వతంగా రద్దు చేయాలని ఏపీ ఉన్నత విద్యా మండలి రాష్ట్ర ప్రభుత్వానికి సిఫార్సు చేయనున్నట్లు తెలుస్తోంది. ఈ వ్యవహారం విద్యా వర్గాల్లో కలకలం రేపింది. ప్రభుత్వ నిర్ణయంపై ఉత్కంఠ నెలకొంది.