డ్రాగన్‌ ఫ్రూట్ వైపు రైతుల దృష్టి

సంప్రదాయ పంటలతో నష్టాలు ఎదుర్కొంటున్న రైతులు కొత్త మార్గాల కోసం వెతుకుతున్నారు. ఈ నేపథ్యంలో అగ్రికల్చర్ అధికారులు రైతులకు డ్రాగన్ ఫ్రూట్ సాగు చేయాలని సూచిస్తున్నారు. దీర్ఘకాలిక లాభాలు ఇచ్చే ఈ పంటతో రైతులు స్థిరమైన ఆదాయం పొందగలరని చెబుతున్నారు. అధికారుల సమాచారం ప్రకారం, డ్రాగన్‌ ఫ్రూట్ సాగుతో ఎకరానికి ఏటా రూ.3 లక్షల వరకు ఆదాయం వచ్చే అవకాశం ఉంది. దేశీయంగానే కాకుండా ఎగుమతుల మార్కెట్లో కూడా ఈ పంటకు మంచి డిమాండ్ ఉందని వారు వివరించారు. అంతేకాకుండా ప్రభుత్వం రైతులకు సబ్సిడీ ఆధారంగా పరికరాలు, సాంకేతిక సహాయం అందిస్తోంది. ఆరోగ్యానికి అనేక రకాల ప్రయోజనాలు కలిగించే ఔషధ గుణాలు డ్రాగన్ ఫ్రూట్‌లో ఉండటంతో మార్కెట్లో దీని విలువ రోజురోజుకు పెరుగుతోందని అధికారులు వెల్లడించారు. ఈ పండు రోగనిరోధక శక్తిని పెంచడమే కాకుండా మధుమేహం, హృద్రోగ సమస్యలను నివారించడంలో తోడ్పడుతుందని వైద్య నిపుణులు చెబుతున్నారు. రైతులు సాంప్రదాయ పంటల కంటే డ్రాగన్‌ ఫ్రూట్ సాగుకు ఎక్కువ ఆసక్తి చూపిస్తే, తక్కువ కాలంలోనే అధిక లాభాలు సాధించవచ్చని వ్యవసాయ శాఖ అధికారులు అభిప్రాయపడ్డారు. ఈ పంట భవిష్యత్తు వ్యవసాయంలో కీలక పాత్ర పోషిస్తుందని అంచనా వేస్తున్నారు.