ట్రూ టైమ్స్ ఇండియా అక్టోబర్ 07:
అమరావతి/హైదరాబాద్: ప్రభుత్వ వైద్యులు, ప్రొఫెసర్లు లక్షలాది రూపాయల జీతం తీసుకుంటూనే, ప్రైవేట్ క్లినిక్లు, ఆసుపత్రులు నిర్వహించడంపై గిరిజన ఐక్య సాధన సమితి వ్యవస్థాపక అధ్యక్షులు కేశవ నాయక్ తీవ్ర ఆందోళన వ్యక్తం చేశారు. ప్రభుత్వ వైద్యుల సంపాదన ధ్యేయంగా మారి, విలాసవంతమైన జీవితం గడపాలనే లక్ష్యంతో ప్రైవేట్ ప్రాక్టీస్ను ప్రోత్సహిస్తున్నారంటూ ప్రభుత్వాన్ని ఉద్దేశించి ఆయన ఒక ప్రకటన విడుదల చేశారు.
పేద, బలహీన వర్గాలకు అన్యాయం
కేశవ నాయక్ మాట్లాడుతూ, ప్రభుత్వ వైద్యులు ప్రజలకు సేవ చేయాల్సింది పోయి, కేవలం అధిక డబ్బులు సంపాదించాలనే లక్ష్యంతో పనిచేయడం వల్ల పేదలు, నిరుపేదలు, బడుగులు, బలహీన వర్గాల ప్రజలకు ప్రభుత్వ వైద్యశాలల్లో సరైన వైద్యం అందడం లేదని ఆవేదన వ్యక్తం చేశారు.
ప్రభుత్వం లక్షలాది రూపాయల జీతం ఇస్తున్నప్పటికీ, ఆ జీతంతో సంతృప్తి చెందకుండా ప్రైవేట్ హాస్పిటల్స్ నిర్వహిస్తూ, సంపాదనే ద్వేయంగా పనిచేస్తున్నారు. దీని ఫలితంగా ప్రభుత్వ ఆసుపత్రులలో వైద్యం నాణ్యత తగ్గి, పేదలకు వైద్యం అందని ద్రాక్షగా మారుతోంది" అని ఆయన విమర్శించారు.
ప్రైవేట్ ప్రాక్టీస్ను ప్రోత్సహిస్తున్న ప్రభుత్వం
ప్రభుత్వ వైద్యులు ప్రైవేట్ ఆసుపత్రులను నడుపుతున్నా, వారికి ప్రభుత్వం ప్రమోషన్లు ఇస్తూ, సమాజంలో గౌరవ మర్యాదలను పెంచుతోందని నాయక్ అన్నారు. ఇది పరోక్షంగా ప్రైవేటు హాస్పిటళ్లను ప్రభుత్వం ప్రోత్సహిస్తున్నట్టుగా ప్రజలు భావించడానికి దారితీస్తుందని ఆయన పేర్కొన్నారు.
కేశవ నాయక్ విజ్ఞప్తి
ప్రభుత్వ వైద్యులు, ప్రొఫెసర్లు తమ వైఖరిని మార్చుకోవాలని కేశవ నాయక్ ఈ సందర్భంగా రాష్ట్ర ప్రభుత్వానికి మరియు వైద్యులకు విజ్ఞప్తి చేశారు.
ముఖ్య డిమాండ్లు:
* ప్రభుత్వ వైద్యులు, ప్రొఫెసర్లు ప్రభుత్వం ఇస్తున్న జీతాలతోనే సరిపెట్టుకోవాలి.
* సేవాభావంతో ప్రజలకు, ముఖ్యంగా పేదలకు ప్రభుత్వ వైద్యశాలల్లోనే నాణ్యమైన వైద్యం అందించాలి.
ప్రభుత్వం ఇప్పటికైనా ఈ అంశంపై దృష్టి సారించి, ప్రభుత్వ వైద్య సేవలను మెరుగుపరచడానికి కఠిన చర్యలు తీసుకోవాలని ఆయన డిమాండ్ చేశారు.
Comments
Post a Comment