దేశానికి తొలి విద్యాశాఖ మంత్రి, స్వాతంత్య్ర సమరయోధులు మౌలానా అబుల్ కలాం ఆజాద్ జయంతి వేడుకలను స్థానిక పంచాయతీ కార్యాలయం లో మంగళవారం ఘనంగా నిర్వహించారు. ఈ సందర్భంగా పలువురు వక్తలు మౌలానా సేవలను కొనియాడారు.
ప్రతి సంవత్సరం నవంబర్ 11న ఆయన జయంతిని పురస్కరించుకుని దేశం జాతీయ విద్యా దినోత్సవంగా జరుపుకొంటుందని వక్తలు పేర్కొన్నారు. మౌలానా అబుల్ కలాం ఆజాద్ భారతదేశ విద్యా వ్యవస్థకు చేసిన సేవలను వారు ప్రత్యేకంగా గుర్తు చేసుకున్నారు.
మౌలానా ఆజాద్ సేవలను కొనియాడిన వక్తలు:
మౌలానా 1888, నవంబర్ 11న మక్కాలో జన్మించారని, ఆయన అసలు పేరు మొహియుద్దీన్ అహ్మద్ అని, 'అబుల్ కలాం' బిరుదు కాగా, 'ఆజాద్' ఆయన కలంపేరు అని వక్తలు తెలిపారు.
స్వాతంత్ర్య పోరాటంలో పాత్ర: ఆయన భారత స్వాతంత్ర్య సంగ్రామంలో ముఖ్య నాయకులలో ఒకరిగా, మహాత్మా గాంధీకి సన్నిహితుడిగా పనిచేశారని పేర్కొన్నారు.
విద్యా వ్యవస్థకు పునాదులు: స్వతంత్ర భారతదేశానికి మొదటి విద్యాశాఖ మంత్రిగా (1947 నుండి 1958 వరకు) పనిచేసి దేశ విద్యా విధానానికి బలమైన పునాదులు వేసిన ఘనత మౌలానాకు దక్కుతుందని వక్తలు అన్నారు.
ఉన్నత విద్యా సంస్థల ఏర్పాటు: ఆయన దూరదృష్టి కారణంగానే దేశంలో ఇండియన్ ఇన్స్టిట్యూట్ ఆఫ్ టెక్నాలజీ యూనివర్సిటీ గ్రాంట్స్ కమిషన్ వంటి ఉన్నత విద్యా సంస్థలు ఏర్పడ్డాయని ప్రశంసించారు.
బహుభాషా కోవిదుడు: ఆయన ప్రఖ్యాత పండితుడు, కవి, రచయిత అని, అరబిక్, ఇంగ్లిష్, ఉర్దూ, హిందీ, పర్షియన్, బెంగాలీ వంటి అనేక భాషలలో ప్రావీణ్యం ఉన్నదని వక్తలు వర్ణించారు.
మౌలానా చేసిన విశిష్ట సేవలకు గుర్తింపుగా ఆయన జయంతిని ఘనంగా జరుపుకున్నట్లు వక్తలు తెలిపారు.
ఈ కార్యక్రమంలో పంచాయతీ కార్యదర్శి గౌస్ సాహెబ్, ఎంపీటీసీ సభ్యులు వన్నూర్ సాబ్, సీనియర్ ఎలక్ట్రీషియన్ ఉక్కీసుల గోపాల్, వార్డు సభ్యులు నిరంజన్ గౌడ్, లెనిన్ బాబు, రవి, మైనార్టీ నాయకులు బెలగల్ షమ్ము, జిలాన్, రఫీ షఫీ, బళ్లారి జమీర్, శంషు, ఖాదర్ భాష, ముస్తూరు భాష, ఫ్రేమ్ వర్క్ ఖాదర్ తదితరులు పాల్గొన్నారు.