మానవ సేవే మాధవ సేవ'.. సత్యసాయి బాట అనుసరణీయం: రాష్ట్రపతి ద్రౌపది ముర్ము

 '

పుట్టపర్తిలో వైభవంగా సత్యసాయి శత జయంతి వేడుకలు

హాజరైన రాష్ట్రపతి ముర్ము, సీఎం చంద్రబాబు

పుట్టపర్తి/అనంతపురం: శ్రీ సత్యసాయి బాబా శత జయంతి ఉత్సవాలు పుట్టపర్తిలోని ప్రశాంతి నిలయంలో అత్యంత వైభవంగా జరిగాయి. ఈ వేడుకలకు భారత రాష్ట్రపతి ద్రౌపది ముర్ము ముఖ్య అతిథిగా హాజరుకాగా, ఆంధ్రప్రదేశ్ ముఖ్యమంత్రి నారా చంద్రబాబు నాయుడు విశిష్ట అతిథిగా పాల్గొన్నారు. ఈ సందర్భంగా 'సత్యసాయి మహాసమాధి'ని దర్శించుకున్న రాష్ట్రపతి, సీఎం.. బాబాకు ఘన నివాళులు అర్పించారు.

లోక కల్యాణమే బాబా లక్ష్యం: రాష్ట్రపతి

సభలో రాష్ట్రపతి ద్రౌపది ముర్ము ప్రసంగిస్తూ, సత్యసాయి బాబా బోధనలు నేటి సమాజానికి ఎంతో అవసరమని నొక్కి చెప్పారు. "మానవ సేవే మాధవ సేవ అని నమ్మిన మహానుభావుల్లో బాబా అగ్రగణ్యులు. సత్యం, ధర్మం, శాంతి, ప్రేమ వంటి మార్గాల ద్వారా ఆయన లోక కల్యాణానికి కృషి చేశారు. 1969 నుంచే మహిళా సంక్షేమానికి బాబా ప్రాధాన్యతనిచ్చారు. ప్రస్తుతం సత్యసాయి సెంట్రల్ ట్రస్ట్ విద్య, వైద్యం, తాగునీటి రంగాల్లో చేస్తున్న కృషి, జాతి నిర్మాణంలో వారి పాత్ర అభినందనీయం," అని రాష్ట్రపతి కొనియాడారు. ఈ సందర్భంగా 'సత్యసాయి ట్రైబల్ ఉమెన్ హెల్త్ కేర్' కార్యక్రమాన్ని ఆమె ప్రారంభించారు.

ప్రపంచ శాంతికి బాబా సూత్రాలే మార్గం: సీఎం చంద్రబాబు

ముఖ్యమంత్రి చంద్రబాబు మాట్లాడుతూ, " 'లవ్ ఆల్.. సర్వ్ ఆల్' (అందరినీ ప్రేమించు.. అందరినీ సేవించు) అనే బాబా సిద్ధాంతం ప్రపంచ శాంతికి పునాది వంటిది. బాబాతో నాకు దశాబ్దాల అనుబంధం ఉంది. గతంలో ఉమ్మడి అనంతపురం జిల్లా తాగునీటి ప్రాజెక్టు కోసం అవసరమైతే ప్రశాంతి నిలయాన్ని తాకట్టు పెట్టడానికైనా సిద్ధమని బాబా ప్రకటించారు. ఆ గొప్ప మనసు వల్లే భక్తులు భారీగా విరాళాలు అందించి ప్రాజెక్టును విజయవంతం చేశారు," అని గుర్తుచేసుకున్నారు. 140 దేశాల్లో, 7.50 లక్షల మంది వాలంటీర్లతో ట్రస్ట్ సేవలు విస్తరించడం అద్భుతమని సీఎం ప్రశంసించారు.

అంతకుముందు సత్యసాయి విమానాశ్రయానికి చేరుకున్న రాష్ట్రపతికి గవర్నర్, సీఎం చంద్రబాబు, మంత్రి నారా లోకేశ్, ఇతర ఉన్నతాధికారులు ఘన స్వాగతం పలికారు. ఈ వేడుకల్లో మంత్రులు, ఎమ్మెల్యేలు, ట్రస్ట్ సభ్యులు మరియు దేశవిదేశాల నుంచి వచ్చిన వేలాది మంది భక్తులు పాల్గొన్నారు.