బెంగళూరు:బెంగళూరు నగంలో హృదయ విదారక ఘటన వెలుగులోకి వచ్చింది. కన్న కూతురు ఎదుటే ఓ భర్త తన భార్యను కత్తితో పొడిచి హతమార్చాడు. ఈ ఘటనతో స్థానికులు షాక్కు గురయ్యారు.
వివరాల ప్రకారం, రేఖ (32) అనే మహిళకు భర్త లోహితాశ్వతో గత కొంతకాలంగా విబేధాలు కొనసాగుతున్నాయి. తరచూ ఇద్దరి మధ్య వాగ్వాదాలు జరిగేవి. ఈ నేపథ్యంలో రేఖ, మరో వ్యక్తితో సన్నిహితంగా ఉంటుందని అనుమానం వ్యక్తమైంది. భర్తకు రేఖ వివాహేతర సంబంధం పెట్టుకుందని తెలిసి, వారి మధ్య కలహాలు మరింత ఎక్కువయ్యాయి.
తాజాగా రేఖ తన కూతురుతో కలిసి ఇంట్లో ఉండగా, లోహితాశ్వ అక్కడికి చేరుకున్నాడు. ఆ సమయంలో రేఖ ప్రవర్తనపై అతనికి అనుమానం కలగడంతో తీవ్ర ఆగ్రహానికి లోనయ్యాడు. ఆవేశంతో తన వద్ద ఉన్న కత్తితో వరుసగా 12 సార్లు రేఖపై దాడి చేశాడు. తీవ్ర గాయాలతో ఆమె అక్కడికక్కడే కుప్పకూలింది. కన్న కూతురు ఈ దృశ్యం చూసి భయంతో విలపించిందని ప్రత్యక్ష సాక్షులు తెలిపారు.
సమాచారం అందుకున్న పోలీసులు సంఘటన స్థలానికి చేరుకొని మృతదేహాన్ని స్వాధీనం చేసుకున్నారు. హత్యకు పాల్పడిన లోహితాశ్వను అదుపులోకి తీసుకొని విచారణ ప్రారంభించారు. ఈ ఘటనతో ఆ ప్రాంతంలో ఉద్రిక్త వాతావరణం నెలకొంది.
స్థానికులు మాట్లాడుతూ, “కన్న కూతురు ఎదుట ఇంత క్రూరంగా భార్యను హతమార్చడం దారుణం. కుటుంబ కలహాలు ఇంత భయానక స్థాయికి చేరడం చాలా విచారకరం” అని ఆవేదన వ్యక్తం చేశారు.
