ధర్మవరం, ట్రూ టైమ్స్ ఇండియా
అక్టోబర్ 09: ధర్మవరం పట్టణంలోని 7వ వార్డు, కేశవనగర్కు చెందిన పలు వీధుల్లో రూ.10 లక్షల వ్యయంతో సైడ్ కాలువల (డ్రైన్స్) నిర్మాణ పనులు చురుగ్గా సాగుతున్నాయి. 15వ ఫైనాన్స్ నిధుల కింద చేపట్టిన ఈ పనులను రాష్ట్ర వైద్య ఆరోగ్య శాఖ మంత్రి సత్య కుమార్ యాదవ్ గారి ఆదేశాల మేరకు అమలు చేస్తున్నారు.
మంత్రి నియోజకవర్గ ఇన్ఛార్జ్ హరీష్ బాబు గురువారం ఈ నిర్మాణ పనులను స్వయంగా పర్యవేక్షించారు. ఈ సందర్భంగా ఆయన మాట్లాడుతూ –– ధర్మవరం పట్టణంలోని ప్రతి వార్డులో డ్రైనేజ్ సమస్యలు తొలగించేందుకు మంత్రి సత్య కుమార్ యాదవ్ ప్రత్యేక శ్రద్ధ చూపుతున్నారని తెలిపారు.
"కేశవనగర్లో 15వ ఫైనాన్స్ నిధుల కింద రూ.10 లక్షలతో నాలుగు వీధుల్లో సైడ్ కాలువల పనులు ప్రారంభమయ్యాయి. ప్రజల ఆరోగ్య భద్రత దృష్ట్యా ఈ పనులు అత్యవసరం. మంత్రి సహకారంతో ఈ పనులు వేగంగా పూర్తవుతున్నాయి," అని హరీష్ బాబు పేర్కొన్నారు.
అలాగే, ప్రతి వీధికి శాశ్వత డ్రైనేజ్ వ్యవస్థ ఏర్పాటు చేయడం ద్వారా ధర్మవరం పట్టణంలో చెరువులు, కాలువలు మురికి నీటితో నిండిపోకుండా చర్యలు తీసుకుంటున్నామని ఆయన వివరించారు. దీని ద్వారా ధర్మవరం పట్టణం పరిశుభ్రంగా, ఆరోగ్యకరంగా మారుతుందని తెలిపారు.
హరీష్ బాబు ఈ సందర్భంగా స్థానిక ప్రజలతో మాట్లాడి, జరుగుతున్న పనుల నాణ్యతను పరిశీలించారు. ప్రజల అవసరాలను తీర్చేందుకు ఎన్డీఏ కూటమి ప్రభుత్వం ఎల్లప్పుడూ ముందుంటుందని ఆయన స్పష్టం చేశారు.