విలేకరి నుంచి వీఆర్వో లంచావతారం

  

​అనంతపురం, నార్పల మండలం: ప్రభుత్వం పారదర్శక పాలన, అవినీతి రహిత వ్యవస్థ అంటూ నినాదాలు ఇస్తున్న వేళ... క్షేత్ర స్థాయిలో రెవెన్యూ అధికారులు సామాన్య ప్రజలను, రైతులను ఏ విధంగా దోచుకుంటున్నారో అనంతపురం జిల్లాలోని నార్పల మండలం దుగుమర్రి గ్రామం నిరూపించింది. భూమి మ్యుటేషన్ కోసం ఒక VRO (గ్రామ రెవెన్యూ అధికారి) ఏకంగా ₹38,000 లంచం డిమాండ్ చేసిన ఆడియో లీక్ కావడంతో జిల్లాలో సంచలనం రేకెత్తింది.

​అవినీతి ధైర్యం... అహంకారం:

దుగుమర్రి గ్రామానికి చెందిన రైతు తన భూమి మ్యుటేషన్ కోసం VRO వెంకోబరావు స్వామి వద్దకు వెళ్లగా, అధికారి అత్యంత అహంకారపూరితంగా వ్యవహరించినట్లు ఆడియో స్పష్టం చేస్తోంది. "సంతకం కావాలంటే ₹38,000 ఇవ్వాల్సిందే" అని నేరుగా లంచం డిమాండ్ చేయడమే కాకుండా, MRO (మండల రెవెన్యూ అధికారి) ప్రమేయం గురించి రైతు ప్రశ్నించగా, "నా వాటా నాకు ఇచ్చేయాల్సిందే... MRO తో మీరే మాట్లాడుకోండి" అంటూ నిర్లక్ష్యంగా సమాధానం చెప్పడం రెవెన్యూ వ్యవస్థలోని దారుణమైన స్థితిని కళ్లకు కట్టింది.

​ప్రజాధనం కాదు, దోపిడీ: ఇది లంచగొండి రాజ్యం!

ప్రభుత్వ పథకాలు, సేవలు ఇంటికే వస్తాయని చెబుతున్నా... రైతులకు తమ సొంత భూమి పత్రాలపై సంతకం పొందడానికి కూడా ఈ 'అవినీతి గాళ్లు' లక్షల్లో పీకుతున్నారు. VRO వెంకోబరావు స్వామి ధైర్యం, ధోరణి చూస్తుంటే, ఈ దోపిడీ కేవలం కింది స్థాయి అధికారి నుంచి కాక, మొత్తం వ్యవస్థ అండదండలతోనే సాగుతోందా అనే అనుమానాలు బలపడుతున్నాయి.

​ప్రజల ప్రశ్న: వీళ్లెక్కడ అధికారులు?

రౌడీలను, గూండాలను చూసీ చూడనట్లు వదిలేసే అధికార యంత్రాంగం, సామాన్య ప్రజల పట్ల మాత్రం అత్యంత కఠినంగా వ్యవహరిస్తోంది. ఈ లంచగొండి అధికారుల పట్ల అధికారులు ఎందుకు మెతక వైఖరి అవలంభిస్తున్నారో ప్రజలకు అర్థం కావడం లేదు.

​కఠిన చర్యలకు డిమాండ్:

సామాజిక మాధ్యమాల్లో వైరల్ అవుతున్న ఈ ఆడియోపై జిల్లా కలెక్టర్, ఏసీబీ (Anti-Corruption Bureau) అధికారులు తక్షణమే స్పందించాలి. అవినీతికి పాల్పడిన VRO వెంకోబరావు స్వామిని తక్షణమే సస్పెండ్ చేసి, క్రిమినల్ కేసులు నమోదు చేయాలి. కేవలం సస్పెండ్ చేసి సరిపెట్టకుండా, "లంచగొండి అధికారి వీడు" అని రాసిన పలకను మెడలో వేసి ఊరేగించి, అవినీతికి పాల్పడే ఇతరులకు కఠిన సందేశం పంపాలని నార్పల మండల ప్రజలు తీవ్ర ఆగ్రహంతో డిమాండ్ చేస్తున్నారు.

​రెవెన్యూ వ్యవస్థలో పాతుకుపోయిన ఈ అవినీతిపై పూర్తి స్థాయిలో విచారణ జరిపి, క్షేత్ర స్థాయి నుంచి ఉన్నత స్థాయి వరకు ఉన్న లోపాలను సరిదిద్దకుంటే, ప్రభుత్వ లక్ష్యాలు కేవలం కాగితాలకే పరిమితం అవుతాయని ఈ ఘటన హెచ్చరిస్తోంది.